– Se oli tärkkee päivä kväänin taittheele, kielele ja kulttuurille, sannoo teatterijohtaaja Fransk Jørstad NTO:le.
Kvääniteatterin toiminta lähti kunnola käynthiin syksylä 2022, ko se tuli ulos sen ensimäisen oman näyttämäpelin Näkymätön kansa kans, mutta työ teatterin etheen alkkoi jo vuona 2018 ko teatteri perustethiin.
Se oli Norjan teatteri- ja orkesteriyhđistyksen (NTO) vuosimöötissä 20. marssikuuta ko se päätethiin ette nyt kväänitten oma teatteri kans oon tämän ison järjestön uusi jäsen.
– NTO oon iloinen ja ylppee sen ympäri ette met saama Kvääniteatterin meiđän jäseneksi. Het olhaan uusi ja tärkkee toimi joila oon tärkkee ja erottuuva ääni, joka laajenttaa monikertaisuutta norjalaisessa lavataittheenmiljöössä, sannoo NTO:n tirehtööri Morten Gjelten.
NTO oon intressi- ja työnanttaaja järjestö ammatillisille, viralisesti tuetuile toimile, jokka tekkee työtä musikin ja lavataittheen kans.
Het työtelhään sen jäseniitten poliittisten ja ekonomisten assiin ja taittheelisen toimitilan etheen.
– Met kohtaama ja haastama politikkariita ja virkakunttii, tuoma esile meiđän meininkkii, kehitämmä argumentitointtii ja vaikutamma erilaisten ehđotusten kautta, seissoo se muun muassa järjestön nettisaitila.