– NRK:n yksi tärkkee tehtävä oon olla myötä luomassa ylppeyđen tunnetta ja yhteisöllisyyttä – eriliikaisesti sellaisena fästipäivänä ko kväänikansan päivänä. Päivän aikana met tulema nostamhaan esile kväänin kulttuurii ja kieltä. Sen met teemä niin sille pyblikymile, joka ellää sen kans joka päivä, mutta kans muulle osale kansaa, sannoo alueredaktrööri Håkon Grønbech.
Kväänin kieltä TV:ssä
Tänä vuona NRK tekkee jotakin täysin uutta, ko NRK-journalisti tullee tekemhään TV-uutisreportaasin täysin kväänin kielelä. Se oon ensimäinen kerta ikinä, ko kväänin kieltä käytethään viralisena reportaasikielenä TV:ssä.
Kainulaisten päivänä tullee monessa paikkaa maata tapahtumhaan paljon, ja met tulema reportaasin kautta muistelemhaan joittenkin näitten pitojen ympäri.
NRK Kvääni oon kans kirjottannu nuukan nettiartikkelin kväänin minoriteetista, joka tullee tulemhaan ulos huomena NRK:n nettisatile, nrk.no.
Artikkelin kautta pyblikymi ympäri maata päässee oppimhaan lissää kväänin/norjansuomalaisten kansasta, samala ko het tutustuthaan viitheen kväänhiin ja heiđän histooriin. Het muistelee muun muvassa, kunka norjalaistamispolitikki vaikuttaa heihin yhä tänä päivänä.
– Se oon vaikkee ymmärttäät kunka se tapahtui, kommentoi May-Brtii Blomli norjalaistamispolitikkii artikkelissa.
NRK Kväänin journalistit oon kans myötä, ko NRK:n lukijoilla oon mahđolisuus kyssyyt kväänikansan päivän ja kväänikansan ympäri.
NRK Super tullee taas feiraamhaan päivää, ko kymmenvuotinen Villen Yttregaard Jakobsen Raisista oon myötä heiđän programissa.
Kans raatiossa
P2:n yhtheiskuntaprogrami Ekkossa oon vierhaana professori Einar Niemi kello 09:03. Myötä oon kans NRK Kväänin journalisti Laila Lanes, joka muistelee sen ympäri kunka hän sukututkimuksen kautta tajus, ette hän oon kvääni. Lisäksi raatioprogrami Kompasissa P2:n teemana oon kväänit kl. 12:03.
Tromssan ja Finnmarkun raation aluelähätyksessä feirathaan päivää niin aamula ette iltapäivälä.
NRK tullee kans markeeraamhaan päivää Instagramissa. Lisäksi Digital Dybdedesk, NRK Trøndelag, laittaa ulos quizin kvääninkansasta.
NRK TV:sheen tullee keskiviikko aamuna viisi uutta episuudii Anstein Mikkelsenin minidokumentaarifilmistä, Kvenske historier – Kväänin histooriat. Illalla kl. 21:50 NRK1:la nähđään taas dokumentaari Det hemmelig språket.
