Kvääniteatteri tullee ulos uuđen teatteriesityksen kans: – Oon perheen pienemille 

– Monele lapsele tämä oon ensimäinen kohđattelu kväänin kielen ja kulttuurin kans, ja se oon ajatus joka oon hyvä motivasuuni, sannoo Astrid Serine Hoel.

Hän puhhuu Kvääniteatterin uuđen teatteriesityksen, «Kor e Karhu?» (Missä oon karhut?) ympäri missä hän itte oon näyttämäpellaaja ja koreograafi.

Se oon kans teatterin ensimäinen esitys jonka mooliroikkana oon perheen pienimät lapset. Serine Hoel muistelee ette se oon tehty vanhiimille lapsile lastentarhaassa.

– Se oon tehty lastentarhaile ja kulttuuritaloile, sannoo hän.

Soloesitys lapsile

Serine Hoel oon kans kirjoittannu esityksen käsikirjoituksen. Hän tiesti alusta alkkain ette se muistelis pohjaisen eläviitten ympäri.

– Ja ette mie tulisin käyttämhään eläviitten kväänin kielissii nimmii esityksessä.

– Mie kans tiesin varhain ette se fiini kväänin kielinen laulu, «Karhuu menen pyyttämhään», tulis olemhaan myötä, jatkaa hän.

«Kor e Karhu?» oon Serine Hoelsin ensimäinen soloesitys. Hän työteli ensin yksin sen kans, ja seissoo niin ideen, sisälön, kostyymiitten ja rekvisiitan takana.

Hiljemin hän sai tanssaaja Dina Enoksen Elvehaugin myötä laakhiin.

– Ja justhiin ennen premiäärii oon kans «dramaturgi» Teodor Janson ollu myötä formaamassa esitystä.

Esitykselä oli suljettu premiääri Troms Holdningile ja yhđele lastentarhaale Haltin kväänikulttuurisentterissä maikuun alussa.

Sen lisäksi teatteri oon pitäny usheita prööviesityksii lastentarhaissa Raisissa ja Tromssassa.

Syksylä esitys tulhaan näkemhään ympäri Tromssaa ja Finmarkkuu.

– Se oon ollu tođela hauskaa pelata lapsile jokka oon niin myötä esitystä, sannoo Serine Hoel.

Tärkkee satsata pienhiin

Teatterijohtaaja Frank Jørstad oon ollu myötä kahđessa prööviesityksessä. Hänen jälkhiin teatteri oon saanu hyvvää takaisinmellinki niin lapsilta ette raavhailta.

– Mie olen saanu kans itte kokkee kunka lapset tođela oon ollu myötä esityksessä ja saanheet issoi kokemuksii.

Hän muistelee ette lapsentarhaat oon pitkhään kysyny jos Kvääniteatterila olis jotaki kans heile.

Jørstad myönttää ette teatterin esityksen oon tähän saakka olheet liian issoi ja valtavii perheen pienemille. Siksi hän oon iloinen ette heilä nyt oon «Kor e Karhu?».

– Se kans tekkee ette lapset tottuu varhain teatterhiin.

– Ja samala het tulhaan tutuksi kväänin kielen kans, ja saa luonolisen suhtheen siihen. Joten met tehemä kans tärkkeetä kielityötä esityksen avula, sannoo hän.

Teatterijohtaaja saattaa kans paljastaat ette peruskoulun nuorimat oppilhaat tulhaan heti saamhaan oman esityksen.

– Met tulema tekemhään oman esityksen heile syksyn aikana.