Urørt meiner:
1960 og 1985 møtast på fest og finn umiddelbart tonen i måneskinnet. Det høyrast ut som jordbær og sjampis når The Micropops ausar ut forfriskande og fjærlett sommarpop. Frontfigur og vokalist Håkon Njøten har funne go'forma og guidar lyttaren stødig leikent gjennom fargerike og sprudlande lydlandskap, pent dandert med aaaaah-aktig koring, synth og xylofon.
- Kor paradoksalt dette enn måtte høyrast ut, og dette er meint bra, høyrast han på refrenget ut som popsjterna han aldri blei.
Frå Idol til Ukas Urørt
Håkon Njøten er tjueto år men har vert innom fleire aspekt av den norske musikkscena enn dei fleste allereie. I 2004 meldte han seg på det pur popkommersielle maskineriet Idol. Han kom seg heilskinna gjennom hysteriet på ein 5. plass. Og i 2006 debuterte han som soloartist med singelen "Som sommeren".
No spelar han altså i The Micropops saman med Bjarte Sandal på trommer og Simen Krogstie Lagesen på bass. Erlend Hovgaard og Sofie Storaas er eit lite minikor som også riv i på xylofon og tamburin når det trengs.
Soveromsmusikk
Håkon tippar han brukar kring femten timar på å lage musikk i veka. I tillegg kjem bandøving, også blir det resten på skulen.
- Låta "Moonlight" lagde eg delvis på kjøkkenet og delvis i stova. Det var skumring. Teksten lagar eg alltid etter melodi. Eg synstes det var ein happy-mystisk melodi, så eg lagde ein happy-mystisk tekst.
- Vi er veldig glade i xylofon, det er vårt live instrument. Ellers er The Micropops ein gjeng som er glad i elektro-pop, pop og rock.
Fekk ikkje spele på Garage
Håkon Njøten legg ikkje skjul på at det betyr mykje å bli Ukas Urørt.
- Det viser at det går an å lage musikk sjølv om ein har vert med i Idol for lenge sidan.
Det var nemleg ikkje alltid like greit å ha Idolstempelet godt planta i panna.
- Eg fekk ikkje spele på Garage i Bergen etter Idolopptreden. Det er ikkje noko eg grublar mykje over no. Og det går heller ikkje an å angre på å ha vert med i Idol, det blir for teit.
- Det å bli Ukas Urørt er det største som har skjedd meg i min musikkarriere fram til no. Det er så fint å få respons på fem-seks år med låtskriving.
Håkon og resten av The Micropops!
