Aldri vore kaldare i Hedmark i juli

Den tidlegare kulderekorden for juli frå 1964 var på minus 3,5 grader ved Atnsjøen i Stor-Elvdal.

Klokka fem fredag morgon vart det målt minus fire grader i Folldal.

– Juni og juli har vi hatt sju kuldenetter her. Det er mange, og når det byrjar å krype ned til så mange minusgrader, då er det uvanleg, seier folldøl og NRK-reporter, Geir Olav Slåen.

Sjølv om det ofte er kjølig der, er det sjeldan at temperaturen kryp langt over på minussida i juli.

– Det har lett for at det bikkar på ei kaldnatt her i juni og juli som øydelegg statistikken.

Sjølv om kulderekorden for Hedmark er slått, er det ikkje ny kulderekord for Innlandet i juli.

Den vart sett 4. juli i år då gradestokken på Sognefjellshytta viste minus 7,2 grader.

• Ny kulderekord på Sognefjellet

Lågtrykk frå Finland

– Dei låge temperaturane kjem som følge av ein kombinasjon mellom lågtrykket over Sverige og Finland, som gir nordavind over Noreg og klar himmel, seier statsmeteorolog Charalampos Sarchosidis.

– Når det er klar himmel forsvinn all varmen som elles blir fanga av skyene.

Natt til torsdag var det minus 0,2 grader på Evenstad i Stor-Elvdal.

Også Nesbyen i Hallingdal hadde ei kjølig natt med 2,3 grader.

Medan det er nattekaldt fleire stader på Austlandet, kan dei nyte sommaren andre stader i landet.

Lågtrykket har plassert seg slik at det blir varm luft i Nord-Noreg og kaldare luft lengre sør. Det fører til at det i nord vil bli det beste vêret i landet.

• I helga kan ein 40 år gammal varmerekord ryke på Svalbard

Ei kald natt til

Trass minusgrader på natta, stig temperaturane når sola kjem fram. Klokka ni hadde temperaturen i Folldal stige til seks grader, og den kjem til å stige meir i løpet av dagen.

Statsmeteorologen fortel at i løpet av helga vil vêret skifte, men vi må rekne med ei natt til med grader på minussida østafjells.

– Sundag blir det meir skya og det blir slutt på dei låge temperaturane på natta. Etter det vil nok temperaturen halde seg på plussida.

Det er godt nytt for dei som synest det har vore litt for kjølig dei siste nettene.

– Vi er vand med minusgrader oppi Folldal, også om sommaren, seier Slåen.

Han legg til at han ikkje synest det er så artig når terrassen rimar og blir glatt i juli.

– Men vêret får vi ikkje gjort noko med, det er berre å godta det.

• 70 grader forskjell mellom sommar og vinter