Spetakkelet omkring Teater Innlandet held fram. I dag kom Hedmark Teater, som er tiltenkt å ha ei hovudrolle i det komande fellesteatret, med eit klart ultimatum overfor politikarane i Innlandet.
Dei krev nemleg at politikarane bestemmer seg for om dei vil gå for det nye samarbeidet innan 1. april.
- Styret kan ikkje akseptere ytterlegare utsetjing av avgjerda, og vi understreker at dersom utfallet av fylkestingsbehandlingene blir negativt, held Hedmark teater fram som regionteater for folk i Hedmark.
Det seier ein svært klar styreleiar i Hedmark teater, Anne-Lise Bakken.
Strid om nye stillingar
Den siste konflikta omkring teatersamarbeidet kom tidlegare denne månaden, da Hedmark teater lyste ut fleire nye stillingar. Dette meinte mellom anna fylkesordførar i Oppland, Audun Tron, var upassande, og gav uttrykk for at Hedmark teater på denne måten tok seg til rette.
Hedmark teater meinte på si side at dei hadde fått lov til å lyse ut desse stillingane, men gav seg etter dei skarpe reaksjonene og la dei nye stillingane på vent.
- Teatersjef Else Braseth har presisert at denne beslutninga vil medføre færre teaterproduksjonar enn planlagt i 2010, seier Anne-Lise Bakken i si pressemelding.
Fylkestinga i Hedmark og Oppland skal etter planen behandle saka om Teater Innlandet i februar 2010.