Rundt klokka 02 i natt vart det gjort skadeverk på kyrkja i Sel. Ei rute er knust og det finst spor som tyder på at nokon har prøvd å tenne på.
– Det gjekk ein alarm på kyrkja. Ein vekter var like i nærleiken og han var der kort tid etter, seier Erik Trønnes, som er lensmann i Nord-Gudbrandsdal lensmannsdistrikt.
Politiet driv etterforsking på plassen no. Dei har sperra av området og får hjelp av krimteknikarar på plassen.
Dei har ingen mistenkte så langt og ønsker tips frå alle som kan ha sett noko.
– Alle bevegelsar i tidsrommet frå midnatt og utover er interessant. Om du har køyrt forbi, vore i området eller observert noko, ta kontakt med politiet, seier Trønnes.
Fryktar det vil skje igjen
Politiet ser på om det finst likskapar med kyrkjebrannen på Dombås. Kyrkja der begynte å brenne i februar i år og vart truleg tent på.
Trønnes vil ikkje seie kvifor dei meiner dette har likskapar til det som skjedde der, av omsyn til etterforskinga. Men dei fryktar det er same person eller personar som står bak.
– Vi kan slettes ikkje utelukke det. Dei to sakene blir etterforska parallelt. Dei funna som blir gjort blir samanlikna, seier han.
Med to slike hendingar i Gudbrandsdalen i år er lensmannen no redd fleire kyrkjer kan bli råka på same måte.
– Vi er oppriktig bekymra no. No må kommunane og kyrkja følge med framover, og vi i politiet kjem til å patruljere kyrkjene aktivt, seier Erik Trønnes i politiet.
Set inn ekstra vakthald
Dei fleste kyrkjene i Nord-Gudbrandsdal er gamle, verneverdige og listeførte bygg. I natt fekk alle beskjed om å passe ekstra godt på. Biskopen skriv i eit utsegn at det blir ekstra vakthald ved fleire av kyrkjene.
– Alle må no tenke over korleis ein kan heve sikkerheita rundt kyrkjebygga dine. Vi kan ikkje vite om det er nokon som har til hensikt å skade fleire kyrkjer, men vi må gjere det vi kan for å avverje, seier Birgitte Bentzrød, som er prost i Nord-Gudbrandsdal Prosti.
Nokon av kyrkjene har allereie avtaler med vaktselskap eller har overvaking på andre måtar. Prosten seier det kan bli aktuelt framover å ha fysiske vakter fleire stader. Ho synest situasjonen er utruleg trist.
– Det gir berre ein ekstra dimensjon av tragedie om det er nokon som verkeleg ønsker å skade kyrkja, seier ho.
Vil råke innbyggarane hardt
Kyrkja ligg nokre kilometer utanfor Otta sentrum i Sel kommune. Akkurat no er Sel ei av dei kommunane som er hardast råka av koronaviruset.
I kommunen med rundt 5700 innbyggjarar, har meir enn 1000 personar vore i karantene og mange er smitta med viruset. Biskop Solveig Fiske, seier dette gjer situasjonen i kommunen vondt verre.
– Eg tenker på folket i Sel, som no opplever at den utryggleiken som ein allereie lever med no blir forsterka. Hendinga er svært krevjande for det som allereie er ein belasta situasjon med koronaviruset, seier biskopen i ei utsegn i dag.
Lensmannen trur også skadeverket på kyrkja deira vil råke samfunnet der hardt.
– Det er klart dette kjem til å gjere eit stort inntrykk på Sel slik det gjorde på Dombås. Det er klart det er ei stor bekymring, seier Erik Trønnes.