– Nå skal eg fylle opp ein binge med godis!
Maria Josefsson har hendene fulle med å tilfredsstille massane med nordmenn som tek turen til Charlottenberg shoppingsenter for å handle. Ho er ei av rundt 500 som jobbar i det norskeigde senteret. Utan grensehandelen ville det vore vanskeleg å få jobb.
– Eg hadde nok funne på noko, men da måtte eg reise mykje lenger.
Byggjer stadig ut
Utan norskehandelen ville livet vore mykje rolegare i den tidlegare industrikommunen Eda. Det blir planlagt 50.000 nye kvadratmeter med handelssentre, Olav Thons shoppingsenter skal utvidast, og i nabokommunen blir det også utvida.
– Det skapar naturlegvis mange arbeidsplassar i handelen. Men også andre verksemder som bilmekanikarar, tannlegar, frisørar og andre servicebedrifter får meir å gjere på grunn av besøkjande nordmenn, seier ordførar Johanna Söderberg.
Ordføraren for kommunen med 8500 innbyggjarar håpar etter kvart at nordmennene vil gjere meir enn å berre handle når dei kjem til Eda.
Ler litt av nordmennene
I Värmland auka grensehandelen med 10 prosent i fjor. Det betyr at svoltne, tørste og røykhungrige nordmenn la att 5,2 milliardar kroner i regionen i fjor, viser ein rapport om nordisk grensehandel og turisme.
Det fører til at småkommunane Strömstad og Eda er på topp 3 i svensk turisttrafikk, saman med Stockholm.
– Vi høyrer på nordmenn som seier at «eg likar ikkje det svenske smøret», før dei hiv seg over det og plukkar med seg 20 pakker. Utan å vere ekle så ler vi litt av dykk, av og til, humrar Maria Josefsson ved Charlottenberg shoppingsenter.