Dei siste dagane har det vore opprør og brann ved Lier ventemottak i Buskerud. I natt vart tre av brakkene påtent og bebuarane måtte evakuerast.
Deretter vart det bestemt at dei som bur på asylmottaket skal flyttast til Haslemoen transittmottak i Våler kommune i Hedmark.
– Har inga god kjensle
I ettermiddag kom dei 66 asylsøkjarane i buss, og fekk mat og ein stad å bu.
Francis Okeni frå Sør-Sudan har vore i Noreg i sju år og har budd på ventemottak i fire av desse. Han er ikkje tilfreds med å bli flytta frå Lier til Haslemoen.
– Frå Lier kan vi kome til Oslo i løpet av kort tid. Frå her tek det tre timar og kostar 300 kroner. Den største bekymringa er likevel kva som vil skje vidare med oss. Det uroar oss heile tida, eg har inga god kjensle, seier Okeni.
– Behandla som alle andre
Francis Okeni er ikkje glad for at dei er flytta til transittmottaket på Haslemoen.
Foto: Helle Therese Kongsrud / NRKAsylmottaket på Haslemoen har kalla inn ekstra personell slik at dei skal vere klare til å ta imot dei nye bebuarane.
Mottaksleiar Merethe Andresen seier at dei ikkje fryktar at det vil bli ny uro når asylsøkjarane nå er flytta til Haslemoen.
– Vi vil ta imot dei på same måten som vi tek imot andre bebuarar. Og vi vil beskytte dei slik som vi gjer med andre.
Ho seier at dei ikkje har noko problem med å ta imot så mange nye bebuarar på ein gong.
– Vi er vant til at det kjem mange nye folk i løpet av kort tid. Så vi er vant til at det skjer fort, seier Merethe Andresen.
