– Det rasar ned titt og ofte, både framfor og bak meg.
Det seier brøytebilsjåfør Eva Kristin Dahl. I vinter har ho gjort sitt for at vegane til Ulvik skal haldast opne. Og det er ingen jobb for pyser.
Dahl legg ut på vegane trass i rasfaren. Det er jo jobben hennar. Men på Brakanes Hotell i Ulvik, merkar dei godt at rasfaren skremmer folk. Spesielt denne vinteren vinter, som har hatt rekordmange ras her i landet, har fått mange til å melda avbod.
Les også: Verste skred-vinter på 25 år
Direktør ved Brakanes Hotell, Knut Arve Hakestad, seier det rett ut:
– Det merkast godt, ikkje minst økonomisk.
– Så de taper rett og slett pengar på rasfaren?
– Ja, det gjer me, og ikkje ubetydelege beløp heller, svarar Hakestad.
Ser lysare på framtida
Forrige veke måtte Ulvik-samfunnet igjen gje etter for naturkreftene. Då var rasfaren så overhengande at vegen til bygda vart stengt.
Men, hell i uhell: Omlag samstundes som Ulvik sine 1100 innbyggjarar omtrent kjende seg som fangar i eigen bygd, kom gladmeldinga frå fylket. Vegen mellom Ulvik og Bruravik skal sikrast.
Dermed går kanskje også Brakanes Hotell lysare tider i møte.
Låg pris å betala
– Rassikring er enormt viktig, både for privatpersonar og næringslivet her i kommunen. For at det skal kunna skje ei utvikling her.
Det seier Ulvik-ordførar Mona Hellesnes. Prislappen på 130 millionar kroner er vel verdt investeringa, seier ho – som i motsetjing til brøytebilsjåfør Eva Kristin Dahl innrømmer at ho skundar seg forbi dei mest utsette stadene når ho sit bak rattet på veg heim.