Pearl of Scandinavia, eit nytt teaterstykke om terror på danskebåten har premiere på DNS i Bergen 22. mai.
Bergens-rapparen Lars Vaular og Game of Thrones-skodespelar Dar Salim fekk tidleg førespurnad om å delta i oppsetjinga. Men begge sa fyrst nei.
Når stykket som er ein samproduksjon mellom Festspillene i Bergen, Kompani Camping og Den Nationale Scene har verdspremiere neste veke, er det med både Vaular og Salim på laget.
Teaterdebut for Lars Vaular
For fyrste gong har Vaular skrive musikk for teater. Og helst hadde han takka nei. Å synge om dette temaet er ikkje enkelt, meiner han.
– Det handlar om å tore å meine noko. Som innbyggjar i Noreg, den moralske supermakta, så skal du seie det riktige heile tida. Aldri seie noko feil, seier Vaular.
Teaterdebutanten meiner arbeidet med stykket har gjort ham til ein meir modig musikar.
– Ofte kjem det noko bra ut av det at ein gjer ting ein ikkje kan.
Får ofte spørsmål om å spele terrorist
I stykket «Pearl of Scandinavia» vert tre forskjellige historier om terror fortalt. På scenen står ein justisminister, ein sikkerhetsvakt og ein terrorist.
Dei tre skodespelarane på scena Pål Rønning, Hege Aga Edelsteen og Dar Salim skifter roller undervegs i førestillinga og byter på å spille terrorist og offer.
Game of Thrones-skodespelar Dar Salim har ofte blitt spurt om å spele terrorist. Til no har han sagt nei, men med DNS-stykket var det annleis.
– Det interesserer meg ikkje å spele terrorist. Som skodespelar er det så lett å bli sett i bås. Men dette manuset var så bra. Det er veldig interessant at dei same menneska byter karakter tre gonger, seier Salim.