Totalt blei 133 personar meldt til politiet for å køyre med usikra barn i bilen denne veka, etter at Statens vegvesen måndag og tysdag kontrollerte tusenvis av bilførarar.
Heile 83 av dei som blei meldt til politiet, blei tekne på Vestlandet.
Trafikktryggleiksrådgivar i Statens vegvesen, Torbjørn Thiem, er overraska og skuffa over at så mange slurvar med å sikra barna.
– Det er veldig triste tal å få. I fjor då vi hadde tilsvarande kontrollar tok vi berre to som hadde barna heilt usikra, altså utan bilbelte, så vi er veldig overraska over at det var så mange som 83 i år.
Verst på korte turar
På landsbasis blei totalt 133 bilførarar tekne med barn utan bilbelte. Det er ulovleg, og fører både til gebyr og politimelding.
Usikker på korleis du bør sikre ditt barn i bil? Sjå video frå Trygg Trafikk her!
Ifølgje Thiem er det spesielt på korte turar at foreldre slurvar med tryggleiken.
– Folk flest er flinke på langtur, men til butikken eller på veg til barnehagen er det fleire som er slepphendte.
– Kva trur du er årsaka?
– Eg håpar jo at det er mangel på kunnskap, og at dei ikkje gjer det med vilje. Vi har jo etter kvart ein god del forsking på barn i bil, og denne forskinga viser at barn som er sikra er langt tryggare i ulykker. Dei fleste barn som døyr i trafikken, er ikkje sikra riktig.
Mange sikrar feil
Totalt blei over fem tusen bilar kontrollerte, og generelt er norske bilistar flinke til å bruke belte.
Likevel køyrde altså over hundre med barn i bilen utan belte på. I tillegg er mange for lite flinke til å tilpassa selen slik at den sit riktig.
Thiem trur mange som har bilbelte på ungane, gjer feil utan at dei veit det sjølv.
– Den aller vanlegaste feilen er at dei ikkje etterstramar beltet når barnet har sett seg inn, og sjekkar at det ligg tett over hoftene og skuldrene. Deretter er det mange som snur barna framover for tidleg.
Norske styremakter anbefaler å ha barnet bakovervendt i bilen fram til det er fire år gamalt.
Du kan lese meir om korleis du kan sikre barnet ditt i bil på Trygg Trafikk sine heimesider.