Tysdag denne veka tok landslagssjef Åge Hareide ut troppen til EM-kvalikkampane mot Malta og Ungarn.
Der var det ingen Thomas Myhre – så no står keeeperkampen på landslaget mellom Branns Håkon Opdal og Odds Rune Jarstein.
Måndag møtast Odd og Brann til Tippeliga-oppgjer i Skien — den siste sjansen for begge to til å vise seg fram før landskampane.
Og Opdal frå Odda er klar.
– Eg gledar meg veldig til duellen. Eg ønskjer å spele landskampane og medverke til siger i dei, seier Opdal.
Branns sisteskanse tykkjer det er vanskeleg å vurdere seg sjølv opp mot Jarstein.
– Vi har vel begge synt oss å vere stabile allroundkeeparar.
Opdal har stort sett vore solid for Brann i år – og i 3-2-sigeren mot Sandefjord borte var han utan tvil den største årsaka til at bergensklubben kunne reise heim med tre poeng frå Vestfold.
– Det hjalp sjølvsagt på sjølvtilliten den kampen, men som keeper vil ein helst ikkje ha så mykje å gjere på. Dei beste kampane er dei vi vinn med 2-0 eller 3-0.