Ein student frå Bildøy bibelskole i Hordaland blei tysdag alvorleg skadd i ei badeulukke på ein skuletur i Israel.
Dei fleste studentane ved skulen, i tillegg til fire lærarar og rektor, deltok på turen.
- Bakgrunn:
Medelevar blei vitne til ulukka
Skulen har ikkje ønskt å gå i detalj på kva som skjedde, men har uttalt at ingen andre var involvert i hendinga.
Skulen seier til NRK at fleire medelevar blei vitne til badeulukka, som skjedde i Gan Haslosha nasjonalpark i den sørlege delen av Galilea.
Skulen skreiv i ei pressemelding onsdag at studenten er alvorleg skadd. Måndag opplyser Bildøy bibelskole at tilstanden til eleven er uavklara. Den norske ambassaden er orientert om situasjonen.
– Eleven er framleis innlagd på sjukehus og situasjonen er uavklara. Dei pårørande er i Israel, seier Anne Nyvoll Furnes ved leiarlinja på Bildøy bibelskole.
Ho ønskjer av omsyn til dei pårørande ikkje å seia noko om kjønn eller alder på eleven.
Seniorrådgjevar Per Bardalen Wiggen i Utanriksdepartementet seier til NRK at UD er gjort kjent med ulukka, og at dei gjev bistand til familien i samsvar med fast praksis.
Skjermar elevane
Reisefølget kom heim med fly frå Tel Aviv natt til onsdag førre veke. Rektor Gunnar Ferstad blei verande igjen i Israel, men er no tilbake i Noreg.
Onsdag arrangerte skulen ei samling der både kriseteam frå kommunen og bedriftshelsetenesta var på plass.
– Eg vil gjerne få uttrykka mi djupaste medkjensle med familien som står tettast på dette, skreiv rektor i pressemeldinga.
Ifølge avisa Norge IDAG var det 94 elevar ved Bildøy bibelskule i haust.
NRK har vore i kontakt med elevar. Dei ønskjer ikkje å uttala seg, men viser til pressemeldinga.
Furnes opplyser at skulen har bede elevane om ikkje å uttala seg til media.
– Me har bede dei om å visa til skuleleiinga. Elevane er dei sårbare i denne situasjonen.
Får konsekvensar
Ulukka påverkar elevane og skuleavviklinga ved bibelskulen på Sotra.
– Det er klart. Me må tenka litt alternativt i ein sånn situasjon. Me vurderer no korleis me skal planlegga skuledagen framover, seier Furnes.
Ho seier det er for tidleg å slå fast kva konsekvensar ulukka får for skuleløpet.
– Det vil nok vera krevjande for fleire av elevane å konsentrera seg når ein har ein slik uavklara situasjon, seier Furnes til NRK.