Store redningsstyrkar har sidan torsdag søkt etter ei kvinne i slutten av 60-åra, som blei meldt sakna i Klokkarvik i Sund onsdag kveld.
Pårørande er varsla
Fredag kveld har leitemannskap funne ein død person på vestsida av Skjærgardsvegen ved Kolltveit.
– Avdøde er formelt ikkje identifisert, men politiet har grunn til å tru at dette er kvinna me har leita etter, seier operasjonsleiar Vibeke Næss i Vest politidistrikt til NRK.
Familien til den sakna kvinna er varsla om funnet.
– Har politiet ei meining om kva som har ført til dødsfallet?
– Nei, det er det for tidleg å seia noko om.
Politiet mistenker ikkje at det har skjedd noko kriminelt.
Funn etter nytt finsøk
Det var frivillige frå Røde Kors som fann den døde kvinna i Sund.
– Mannskapet fann først gjenstander som tilhøyrte kvinna før ein vidare fann kvinna i tilknyting til eit vatn, seier Kent Eivind Vorland, leiar for Hordaland Røde Kors Hjelpekorps.
Nærare 60 frivillige frå Røde Kors deltok i søket fredag. Sivilforsvaret stilte med mellom 70 og 80 personar, og har saumfart det varierte og krevjande terrenget utan stans sidan leiteaksjonen blei sett i gang. Kvinner og menn i heile bergensregionen blei beordra ut.
Leitemannskapa gjekk først grovt og breitt ut i håp om å finna den sakna i live, før ein seinare har gjennomsøkt fleire område på nytt.
– Det var eit langt grundigare søk som gjorde at ein gjorde funn i kveld, seier Vorland.
Store leitestyrkar
Onsdag kveld ved midnatt blei kvinna i 60-åra meldt sakna av familien. Kvinna skal sist ha blitt sett ved heimen sin i Klokkarvik.
Sidan har det gått føre seg ein stor leiteaksjon på land, i vatn og med helikopter. På Twitter takkar politiet frivillige og anna mannskap som deltok i leiteaksjonen.
Frivillige frå Røde Kors, Norske Redningshunder og Norsk Folkehjelp har delteke i søket. Teorien er at kvinna har falle eller slått seg i samband med at ho var på tur.