NRK Meny
Normal

Kule gjekk tvers gjennom huset til Annie

FANA (NRK): No er den lokale skytebanen stengd. – Eit under at det gjekk så bra som det gjorde, seier Annie Seim.

Annie Seim fikk kule gjennom veggen

SJOKKERT: Annie Seim skulle ta inn terrasseputene i tilfelle det blei regn. Det kan ha redda livet hennar, trur ho.

Foto: Leif Rune Løland / NRK

– Eg sat i denne stolen, men så reiste eg meg for å ta inn nokre puter på terrassen. Då eg gjekk over golvet eksploderte det bak meg, fortel Annie Seim medan ho viser NRK rundt i huset i Fana i Bergen.

84-åringen er framleis skaka etter episoden som skjedde rundt klokka 18 tysdag kveld.

Meiner putene kan ha redda livet

Berre sekund før ei kule gjekk gjennom veggar og inn i stova, sat Seim i skotlinja. Ho såg på tv då ho bestemte seg for å rydda inn putene i tilfelle det blei regn.

I det ho gjekk tilbake over stovegolvet small det bak henne, fortel ho.

– Kula hadde treft meg om eg framleis hadde sete i stolen, seier Seim medan ho viser NRK kulehola i husveggen.

Seim karakteriserer smellet som «ein eksplosjon». Etter å ha fått summa seg oppdaga ho eit hol i husveggen. Først då ho gjekk inn på kjøkkenet og oppdaga eit hol til, skjøna ho at det var snakk om ei kule.

Annie Seim fikk kule gjennom huset

TVERS GJENNOM HUSET: Først då Annie Seim gjekk inn på kjøkkenet og såg det andre kuleholet, forstod ho at det var snakk om ei kule frå eit våpen. – Eg leitte lenge og fann ho til slutt under sofaen.

Foto: Leif Rune Løland / NRK

– Eg var heilt skjelven og i sjokk då eg ringde son min. Det er eit under at det gjekk så bra.

Politiet trur kula blei fyrt av to kilometer unna

Politiet gjorde undersøkingar i bustaden i Harald Sæveruds veg i går kveld.

– Eg veit ikkje kva kraft dette prosjektilet har hatt etter at det trengde gjennom veggane og kva skade det eventuelt kunne ha gjort. Tilfellet er såpass alvorleg at me tek det på største alvor, seier stasjonssjef i Bergen Sør, Bård-Tore Norheim.

Politiet jobbar ut frå ein teori om at skotet har kome frå skytebanen på Stavollen på Stend. I luftlinje er avstanden vel to kilometer frå huset til Seim. Prosjektilet stammar frå ei rifle.

Bård-Tore Norheim

ALVORLEG: Stasjonssjef Bård Tore Norheim ved Bergen Sør politistasjon ser med alvor på episoden. Skytebanen to kilometer unna blei stengd på dagen.

Foto: Stian Røkenes / NRK

– Det er ein avstand eit prosjektil lett kan gå. Det er hovudteorien, seier Norheim.

Skytebanen fekk umiddelbart munnleg pålegg om å stansa all skyteaktiviteten på banen.

– Det blir fylgt opp med eit skriftleg pålegg i ettermiddag. Politiet vil gjera tilsyn i området før me vurderer korleis episoden blir fylgt opp vidare.

Ingen sikta i saka

Politiet har kalla inn krimteknikarar for å finna ut kva bane prosjektilet har hatt for å stadfesta teorien. Ingen er sikta i saka.

– Me veit at det var skyteaktiviteten på skytebanen. Utover det har eg ingen kommentar, seier Norheim.

Fana skytterlag hadde trening på banen tysdag kveld.

Leiar Atle Skogstrand i Fana skyttarlag seier til BA at han er informert av politiet om episoden.

– Så langt eg forstår er det ikkje stadfesta at skotet kjem frå skytebanen. Det er under etterforsking.

Siste video

Det aller første julemarkedet i Bergen er en suksess. Den første uken det har vært åpent har tusenvis av mennesker vært innom.
Vestlandsrevyen 12. desember 2017