- Vi bur i ein ganske rolig bydel, men Kibraslummen ligg berre nokre kilometer herfrå, og vi høyrde skyting då dei starta med å skyte ut tåregass, seier Andreas Kårbø.
- Føler de dykk trygge?
- Ja, vi har eit område på 80 mål med godt vakthald, så vi føler oss trygge her, seier han
President Mwai Kibaki blei gjenvald som president i Kenya på søndag, men opposisjonen hevdar at valet har vore prega av omfattande valfusk. Like etter at det jamne resultatet blei offentleggjort, starta bråket. Og verst var det i slummane.
Nokre av slummane har over ein million innbyggjarar.
- Når folk brakar saman der, så blir det mykje bråk, seier Kårbø.
44 personar er på den norske skulen no, og fleire grupper med nordmenn busett i farlege området har tatt inn på skulen.
Storbritannia har åtvara folk mot å opphalde seg i hovudstaden Nairobi. Så langt har ikkje det norske utanriksdepartementet kome med generelle reiseråd om Kenya.
- Vi kan berre halde oss til det ambassaden seier, og rådet deira er at vi ikkje forlet området, seier Kårbø.
- Vi har det bra, men dessverre er det mange av våre kenyanske vener som ikkje har det så bra.
Nyttårshelga blei feira med grilling og norske kaker - men utan rakettar.