– Me ynskjer ein dialog med båe partane for å sjå om det er mogleg å gjera miljøbelastninga mindre, seier byutviklingsbyråd i Bergen, Anna Elisa Tryti (Ap).
Naboane reagerer på at mange av dei hundrevis av lastebilar som køyrer inn og ut av steindeponiet i Hordnesskogen i Fana, køyrer den same steinen inn og ut av området same dag.
- Bakgrunn:
Byråden vil ha svar
Av og til er det berre snakk om korte stansar inne på deponiområdet.
– Bergen kommune har godkjent steindeponiet i Hordnesskogen. Men me er veldig opptekne av den samla miljøbelastninga i området.
Difor har Tryti kalla inn Statens vegvesen og Bybanen Utvikling til eit møte i morgon tidleg. Målet er å finna ei løysing på korleis miljøbelastninga kan reduserast.
– Me må vurdera kva handlingsrom me har, sett ut ifrå dei kontraktane som er inngått. Samstundes må utbygginga av veg, deponering av massar og utfylling i Lungegårdsvann få gå sin gang.
– Tilfeldig at det er same lastebilfirma
Austad AS vann først underoppdraget med å flytta steinmassane for Statens vegvesen. Seinare vann entreprenøren også underoppdraget med å frakta den same steinen for Bybanen Utbygging.
Men før den tid hadde allereie Statens vegvesen og Bybane Utbygging inngått kontrakt om å samla steinmassane i deponiet.
– I utgangspunktet var ikkje me klar over at deler av steinen skulle til Store Lungegårdsvann. At det no er det same lastebilfirmaet som køyrer, er tilfeldig. Hadde to ulike firma vunne anboda, hadde ikkje dette vore ei problemstilling i det heile, seier prosjektleiar Sverre Ottesen i Statens vegvesen.
– Avhengig av buffermasse
For å oppfylla sine krav til kontraktane, må altså steinen leverast og hentast i deponiet, sjølv om det utgjer ein omveg på 2,4 kilometer kvar veg for dei lastebilane som i teorien kunne køyrt direkte.
Sidan etterspurnaden etter massar ved utfyllinga ikkje alltid matchar pågangen av stein frå tunnelarbeidet, er ein avhengig av ei jamn tilførsle til steindeponiet, seier fungerande direktør i Bybane Utbygging, Terje Simmenes.
– Det er ikkje alltid me kan ta imot massar direkte frå tunnelen. Det må difor vera ein buffermasse i deponiet å ta av når me treng steinen, seier direktøren.
Simmenes seier han var kjent med at «ein mindre del av bilane» køyrde tur-retur med den same steinen.
– Forstår at folk stiller spørsmål
I går kalla prosjektleiar Ottesen metoden for «molbo». Bybane-direktøren forstår at enkelte stiller spørsmål ved den ekstra køyringa, og seier at partane vil diskutera kor vidt løysinga dei har valt, er den beste.
– Det må me diskutera under møtet. Om dette er hendige unntak eller om det skjer ofte, vil vera avgjerande for kva me vurderer.