– Busetjing kan ikkje løysast ved frivillig dugnad, ein dugnad Frp lokalt har blokkert i årevis. Både den enkelte flyktning og det norske samfunnet tapar på dette, seier Andersen.
I dag sit kring 5.000 flyktningar på asylmottak og ventar på å få tildelt ein kommune å bu i. I 2014 blei kommunane bedde om å ta i mot 10.000, men mange kommunar seier nei til å ta i mot flyktningane.
Dette må det bli slutt på, meiner Andersen.
– Me må få på plass både ny busetjingsordning og moglegheit til å jobbe medan du søkjer asyl. Ingenting er meir skadeleg enn passivitet, eller at folk nærmast ikkje har anna val enn å jobbe svart.
– Må få velje kvar dei vil bu
UDI-direktør Frode Forfang har tidlegare talt for at flyktningar bør få velje bustad sjølve, og at pengane skal følgje flyktningen til den kommunen han eller ho vel å busetje seg i.
– Slik kan flyktningar i større grad få ta ansvar for seg sjølv og framtida si. I staden for å bli behandla som passive klientar, får flyktningane då moglegheit til å ta tilbake kontrollen over eige liv. Det vil gagne den enkelte flyktning, og samfunnet, seier Andersen.
Vil ikkje gi arbeidsløyve
Frps Helge André Njåstad seier busetjingsproblema mellom anna skuldast bustadmangel.
– Det kan også vere enkelte av Frps lokalpolitikarar har vore negative som følgje av den raudgrøne regjeringas manglande evne til å sende ut dei som ikkje skal ha opphald, eller at integreringstilskotet har vore for lågt, seier Njåstad.
Han meiner barne-, likestillings- og inkluderingsminister Solveig Horne har sett meir fokus på dette enn forgjengarane.
– Vi forventar at fleire kommunar vil busetje som følgje av det, seier Njåstad.
Han er negativ til Andersens ønske om sjølvvalt kommune, fordi flyktningane då kan havne i ein kommune utan godt nok integreringsapparat. Njåstad meiner heller ikkje det er relevant å snakke om arbeid.
– Frp arbeider for at asylsøknadar skal handsamast så raskt at det ikkje vil vere relevant med arbeidsløyve i søknadsperioden.