Stormark Konfeksjon på Dokka er landets største produsent av uniformer. Der går det så det susar om dagen. Dei skal sørgje for at kleda er ferdige til 17. mai.
Bedrifta med 30 tilsette får stadig fleire oppdrag for korpsrørsla. I fjor leverte dei om lag 5000 uniformer til korps i heile landet, opplyser økonomisjef Vegard Haave.
- Vi har funne vår nisje og har spesialisert oss på ein liten marknad i Noreg, med få konkurrentar.
Forsvaret er storkunde
Men det er ikkje berre korpsa som får kleda sine frå Stormark konfeksjon. Forsvaret er den største kunden til Stormark konfeksjonsfabrikk. Finuniformene til alle våpengreiner blir produserte på Dokka.
Produksjonssjef Bjørn Vollengen og økonomisjef Vegard Haave har travle vårdagar.
Foto: Anne Marie Hvattum / NRKTidlegare leverte bedrifta ofte til detaljistar, som så selde kleda vidare. Det gjorde uniformene relativt dyre. Men frå 2002 bestemte Stormark Konfeksjon seg for å ta oppdrag direkte frå korps, noko som fører til at uniformere blir billigare.
Problem
Men Stormark Konfeksjon slit også med sitt. Dei 30 som arbeider der, har nok å gjera, men bedrifta slit med rekrutteringa. Gjennomsnittsalderen blir høgare, og dei ønskjer dei seg derfor fleire unge.
- Fabrikkarbeid er vel ikkje det arbeidet dei unge i dag søkjer seg til.
Det seier ei av sydamene, Elna Berget, som sjølv har arbeidd over tretti år på Stormark.
- Men eg trur nok det kan koma til å forandre seg når det er så ustabilt på arbeidsmarknaden, seier ho.
For dei som arbeider der, er det i alle fall nok å hengje fingrane i, ein drøy månad før 17. mai.
