Påkøyrd og drepen i Modum: Politiet etterlyser videoopptak

– Det kan hende at nokon har filma det som skjedde, for eksempel med dashkamera. Vi er interesserte i alle opptak, uavhengig av avstand og kvalitet, seier etterforskingsleiar Silje Holmin ved Hønefoss politistasjon.

Det var fleire vitne til den tragiske ulykka i Modum torsdag. Ein mann i 50-åra, heimehøyrande i Modum, døydde momentant da han blei påkøyrd av ein buss i Åmot sentrum. Politiet har nå avhøyrt ei rekke vitne i saka.

– Vi har ei oppfatning om kva som kan ha skjedd, men det er for tidleg å seie noko om hendingsgangen. Vi har fleire vitne vi må avhøyre, og det står att tekniske undersøkingar, seier Holmin.

Politiet har foreløpig ikkje tatt ut sikting mot bussjåføren.

– Han har foreløpig status som mistenkt i saka, seier Holmin.

Elevar frå Buskerud vidaregåande skole var passasjerar i bussen, og var vitne til det som skjedde. Dei som hadde behov for det, har fått oppfølging av psykososialt kriseteam og helsepersonell.