Fungerer reglane om bandtvang?

• Sei di meining nedst i saka.

Under Hallingskarvet finn me eitt av dei beste beiteområda i landet. Her går sauene til Lars Slettemoen heile sommaren. Dette er og eit svært populært turområde.

Livredde sauer

Dei siste somrane har noko skjedd. Utover beitesesongen blir sauene urolege og skvetne.

Slettemoen trur dei er traumatiserte etter møte med hund. Han merkar det spesielt under sauesankinga om hausten. Dei er til og med redde si eiga livvakt, gjetarhunden.

Sjå video av søya som kjempar for livet:

Respekterer ikkje lova

Av omsyn til både vilt og beitedyr, har Hol kommune utvida bandtvang frå 1. april til 31. oktober. Det har visst ikkje alle fått med seg.

Sveip og sjå kva hundeangrepa i fjor førde til:

– Det hjelper ikkje med bandtvang når lova ikkje blir respektert.

Slettemoen trur mange ikkje veit kvifor hunden må gå i band.

– Har du hund, må du forstå alvoret og vite konsekvensane av å bryte bandtvangen.

Han ønskjer seg eit fjelloppsyn som kan jobbe med informasjon og halde auga med ferdselen. Og meiner at dette er kommunen sitt ansvar.

Ordførar Petter Rukke (Ap) ser problemet. Stadig fleire ferierer i fjellkommunen. Dei siste åra er det bygd hytter i eit rasande tempo. Han vil likevel ikkje ta på seg ansvaret aleine.

– Informasjon er viktig, men det må vera eit generelt samfunnsansvar.

Hyttekommunen Hol er ikkje aleine om å vera plaga med lausbikkjer som jagar vilt og beitedyr. Ordføraren ønskjer ein større debatt om temaet.

Uviss framtid

I mange år har jordbruk og turisme gått hand i hand i Hol, men no ser Slettemoen at dette ikkje går lenger.

– Eg er redd beitenæringa sakte men sikkert forsvinn frå heile hyttenorge.

Frå kommande sommar flytter han sauene frå fjelleigedomen sin til eit beiteområde han har leigd lenger unna Geilo. Han orkar ikkje lenger ha dyra sine i det trafikkerte turområdet.

Ring politiet

– Alle lovbrot kan meldast til politiet, også brot på bandtvang.

Landbruks- og matminister Sandra Borch (Sp) er tydeleg på at politiet kan gi både bøter og andre sanksjonar til hundeeigarar som ikkje respekterer lova. Kommunane kan også laga eigne forskrifter, både for når og kor det skal vera bandtvang, utover perioden 1. april–20. august.

Meiner du at bandtvangsreglane fungerer, eller har du forslag til andre løysingar? Sei di meining her.