– Akkurat no kan ikkje heisen køyre opp og ned på grunn av vêret, seier Sibel Pettersen, som er på jobb i kafeen på Fjellheisen.
Ho fortel at det er om lag 10 – 15 personar som no er vêrfaste på Storsteinen på Fløya, og det både er snakk om turistar og lokalbefolkning.
Når vinden er sterkare enn 20 m/s, må Fjellheisen stå. Nett no er det like over 22 m/s på toppen, men den har vore sterkare enn som så i kveld.
– Det har vore målt 33 m/s i vindkastane, og det vil seie orkan i kastane, seier vakthavande maskinist hos Fjellheisen.
– Vi må jo gå ut ifrå det vi ser på vêrmeldinga når vi avgjer om vi kan køyre tur eller ikkje. Det er vanskeleg å føresjå at det plutseleg blir orkan, så der blir ein ofte tatt på senga, seier maskinisten.
Trass i at vinden er sterk og heisen står, er det ikkje snakk om nokre panikktilstandar.
– Folk skjønner at vi ikkje kan køyre når vinden er så sterk. No ventar vi på å få ei luke slik at vi kan få ned dei gjestane som har venta lenge. No skal vi uansett ikkje fleire turar opp, men dei som er der oppe no skal sjølvsagt kome seg ned før kvelden er over.
