Både brannvesen og politi og ambulanse rykte ut etter melding om husbrannen i natt.
– Vi fekk melding om eit hus som stod i full fyr, ei mil frå Eikefjord sentrum, seier vaktleiar Kolbjørn Øvrebotten.
Alarmsentralen fekk melding frå ein nabo av huset klokka 02.02
Ingen skadde
Huset var ikkje til å redde.
– Huset er totalt nedbrent. Brannvesenet held på med ettersløkking på staden. Det vil vi halde på med nokre timar til.
Til alt hell var det ingen personar i huset då brannen starta, og ingen er skadd i hendinga.
– Eg har forstått det slik at det er folk som har tilhald i huset, men dei må antakeleg vere bortreist, seier Øvrebotten.
Var fare for spreiing
Det var på eit tidspunkt fare for at brannen skulle spreie seg til eit fjøs i nærleiken. Men brannvesenet greidde å hindre spreiing.
– Jobben var å få kontroll slik at flammane ikkje spreidde seg til fjøsen. Det var litt fyr i graset, men vi kom på plass og fekk starte med sløkking og avgrensing, seier Øvrebotten.
Årsaka til brannen er ikkje kjend. Ifølgje politiet blir saka etterforska av Flora politistasjon.