Fann fenghetter blant farleg avfall

Fenghetter er ein tennladning for dynamitt, og låg midt blant lakk, maling og anna eksplosivt avfall.

Dagleg leiar, Håkon Grepstad er rysta over kva folk kastar i søpla.

– Eg tykkjer det er merkeleg at folk kastar slikt der det er farleg avfall.

Kunne blitt ein kraftig eksplosjon

Til alt hell blei fenghettene oppdaga av dei tilsette på avfallsplassen. For i containeren der dei blei funne, stod det også restar av maling, lakk og andre brannfarlege stoff.

Sjølv om akkurat desse fenghettene er avhengige av straum for å gå av, så skulle det ikkje meir til enn at eit ni-volts batteri vart kasta feil i same containeren før katastrofen kunne vore eit faktum.

– Vi kunne fått ein kraftig eksplosjon her. Sprengstoff høyrer ikkje heime hos oss , det skal leverast til dei lovlege returordningane.

Ser alvorleg på saka

I Direktoratet for samfunnssikkerheit og beredskap ser Anne-Wenche Eketuft Gilberg svært alvorleg på funnet på avfallsplassen i Førde.

– Det er ikkje den måten eksplosiv vare skal handterast på. Eksplosive varer krev eit løyve frå oss, og det er strenge krav til oppbevaring. At fenghettene var lagde i ein container, er ikkje i tråd med krava vi stiller.