Sjølv etter kampstart var køane lange for å kome inn på Sør Arena. 5 760 tilskodare er på plass for å sjå Start - Sandefjord.
Foto: Per-Kåre Sandbakk / NRKSørlendingane fekk ein god start på heimebane. 20 minutt ut i kampen sende nemleg Espen Hoff laget i leiinga.
Det var heimelaget som styrte det meste frå første spark i seriefinalen. Men dei store sjansane uteblei. Heile Sør Arena ropte på straffe etter halvtimen, da Mattias Wilhjalmson vart lagt ned innanfor 16-meteren, men dommaren vinka spelet vidare.
Mot slutten av omgangen kom Kamal Saliiti heilt aleine gjennom for vestfoldingane. Men ein god Johnny Kristiansen i Start-buret hindra utlikning.
Start-jubel etter 1-0 scoringa mot Sandefjord.
Foto: Sander Heggheim / NRKKjempesjansar
37 minutt ut i kampen fekk Solomon Owello kjempetreff frå hjørnet av 16-meteren, men ballen gjekk centimeter utanfor krysset til Sandefjord. Berre minuttet seinare vart Espen Hoff spelt aleine gjennom. Men ein vaken Sandefjord-keeper hindra scoring.
Fire minutt før pause fekk Ernest Asante ein kjempesjanse til å doble leiinga. Kantspelaren fekk ballen heilt umarkert på 8–10 meter, men skaut over.
Dermed gjekk laga til pause med 1–0 til Start.
Sjansefattig etter pause
Heimelaget tok initiativet også i andre omgang, men det var Sandefjord som kom til den første store sjansen.
Kamal Salitii headet frå åtte meter etter eit innlegg, men startkeeper Johnny Kristiansen var med på notane.
Andre omgang vart ein sjansefattig affære.
Aggressive Start-spelarar hindra dei fleste overgangene og kontrollerte inn til siger. Dermed er sørlendingane klar for eliteseriespel neste sesong!
