– Kjempeflaks at dette ikkje utvikla seg til ein storbrann

– Det var rett og slett ei glødelampe som hadde ramla ned i eit gammalt tregolv og slått fyr i ein bjelke under golvet, seier utrykkingsleiar Knut Magne Tolleshaug NRK.no.

Det vart slått full alarm hos brannvesenet då dei vart varsla om brannen. Tilfeldigvis var dei på eit møte like ved huset som brann. Dermed var dei på staden berre to minutt etter at meldinga om brannen tikka inn.

Fleire leilegheiter i huset

– Det er jo eit gammal hus med tørt treverk og god trekk. Det skal ikkje mange minutt til før det er full fyr. Vi hadde rett og slett kjempeflaks då vi kom til så tidleg, seier Tolleshaug.

Det er fleire leilegheiter i huset som tok fyr, men brannvesenet såg ingen grunn til å evakuere bebuarane då dei fekk raskt kontroll. Brannen starta i eit rom det ikkje bur folk i, ifølgje Tvedestrandsposten.

– Alle stod på utsida når vi kom fram. I tillegg var ein av dei inne huset med ein slange med vatn, seier han.

To brannar på kort tid

Det er berre litt over ei veke sidan eit gammalt trehus i Tvedestrand vart totalskadd i brann. Brannen var den tredje sentrumsbrannen på få år. Etter brannen uttrykte brannvesenet bekymring for brannsikkerheita i trehusbebyggelsen.

– Det er alltid slik at når vi får ei brannmelding er vi spent på om det er i sentrum. Det går både på den gamle trehusbebyggelsen i tillegg til det å komme seg fram i sentrum, seier brannmeister Espen Gåserud.

– No var vi heldigvis raskt på plass. Det er vel snakk om eitt av dei største trehusa her i byen. Så det kunne jo ha blitt ein stor brann, men det veit ein jo aldri. Men det skulle ikkje ha gått mange minutt før brannen hadde utvikla seg, seier han.