No trur eigaren av grunnmuren i Flekkefjord på ei klekkeleg erstatning.
– Eg ventar eit akseptabelt tilbod som eg kan godta, seier Otto Egedal til NRK.no.
Skader for ein million
Leca-produsenten Weber/Saint-Gobain har vore heime hos Egedal i Flekkefjord tre gonger for å sjå på grunnmuren som skal vere i ferd med å falle saman.
Egedal hevdar taksten på skadene er drøyt ein million kroner, eit krav han er villeg til å gå til retten med.
– Det er jo forferdeleg trist at det skal måtte gå så langt for at dei skal gjere opp for seg. Når du først har blitt gjeldsfri på huset får du kanskje ei rekning som er tre gonger så stor, som det huset kosta når du bygde det, seier eigaren.
Trur på erstatning
Advokat Kjetil Mjaaland vil ikkje kommentere forliket, som kom i stand mellom Leca-produsenten Weber og huseigarane på Tau i Rogaland måndag.
Weber tapte både i tingretten og lagmannsretten. No trur Mjaaland på erstatning til både Egedal og fleire andre med øydelagd Leca-mur.
– Dommen frå Gulating står jo. Den er ikkje rettskraftig, men det skal mykje til for at domstolane skulle dømme anleis i ei tilsvarande sak, seier Mjaaland til NRK.no.
