Dei to sakna, ein mann og ei kvinne i 40-åra, vrakdykka i det tyske lasteskipet «Seattle» i Krosvikfjorden utanfor Kristiansand, og kom aldri tilbake.
LES OGSÅ: Vurderer å gå inn i vraket
Ein miniubåt søkjer no gjennom området, men så langt utan hell.
Politiet: – Veldig farleg
Politiet vil helst unngå å sende dykkarar inn i vraket.
– Det ser vi på som veldig farleg og vi vil prøve å sjå inn i vraket med moglege tekniske hjelpemiddel, seier operasjonsleiar i agderpolitiet, Vidar Neset til NRK.no.
Leitinga etter dei to dykkarane vart sett i gang ved 13.30-tida søndag. Dykkinga skjedde ved krigsvraket «Seattle», der leitemannskap no søkjer etter dei to. I dag vert det gjort søk med ein miniubåt med kamera.
VRAK: Slik ligg det gamle vraket i botnen av Korsvikfjorden.
Foto: Dykkersiden.comVanskelege leiteforhold
– Vi er i dialog med andre om andre moglegheiter dersom vi ikkje finn noko med det utstyret som er på plass no, seier Neset.
Operasjonsleiaren fortel om særs vanskelege leiteforhold i området.
– Det er noko dårleg sikt nede på botnen og dette gjer arbeidet nitidig. Eg veit også at det skal vere dårleg sikt inne i sjølve vraket, seier Neset.
«Seattle» er eit av dei meste kjende skipsvraka i Noreg og eit populært mål for dykkarar. Det 140 meter lange skipet sank under krigshandlingar i april 1940 og vart funne av dykkarar i 1988.
Fleire ulykker
I 1997 omkom ein dansk dykkar i området. I 2001 skjedde det same, og i 2007 fekk ein annan dykkar problem. Året etter måtte ein mann reddast etter å ha fått dykkarsjuke etter dykking ved skipet.
Det har i tillegg vore fleire mindre alvorlege ulykker i samband med dykking ned til skipet.
