– Ein av fleire moglegheiter er at toget har køyrd på raudt lys, seier kommunikasjonsrådgjevar i NSB, Håkon Myhre.
Når dette skjer, kan toget bli spora av automatisk.
- Les òg:
Kan få konklusjon over helga
Både dei og Jernbaneverket sin uhellskommisjon er nå i gang med å leita etter årsaka til togavsporinga i Sandnes torsdag morgon.
Det var ikkje passasjerar i toget då det spora av, og lokføraren kom ikkje til skade. Likevel har uhellet sett strekket Stavanger-Klepp på Jærbanen heilt ut av spel.
Klokka 15 gjekk det framleis buss på strekninga, og det er ikkje sikkert toga kan gå att i løpet av kvelden.
– Om me er heldige, går toga frå i kveld. Me håpar og trur me er i gang til morgonrushet fredag, seier Myhre.
Arvid Bårdstu i Jernbaneverket trur kanskje det kan koma ein konklusjon på årsaka over helga.
– Får mest truleg svar på kva som har skjedd
– Uhellskommisjonen samlar nå inn all nødvendig data. Dersom toget køyrde mot raudt lys vil det koma fram frå dataen i tryggingsanlegget. Me vil i alle høve mest truleg få svar på kva som skjedde, seier Bårdstu.
Han vil ikkje spekulera i kva som er årsaka før det kjem ein konklusjon frå kollegaene hans i Jernbaneverket.
Også Håkon Myhre understrekar at det kan vera heilt andre årsaker, enn køyring på feil signal, som kan vera årsaka til ulukka.