– Med dei siste oppdateringane, er feltet i ferd med å nå same storleiken som Statfjord-feltet. Og Statfjord er det nest største av dei norske oljefelta, etter Ekofisk, seier NRK sin oljekommentator gjennom mange år, Harald Bøe.
– På sitt beste pumpa selskapa opp 750 000 fat olje i døgnet frå Statfjord. Den olja blei omsett for opptil 500 millionar kroner, eller ein halv milliard i døgnet, oppsummerer Bøe.
Frå to til eitt
I starten såg det ut til å vera to felt, og derfor fekk dei også to forskjellege namn, nemleg Aldous og Avaldsnes.
- Men nå er det klart at felta heng saman og då må dei reknast som eitt felt, seier Harald Bøe.
Fasit er ukjent
Oljekommentator Harald Bøe, ser heller ikkje vekk frå at oljefeltet kan bli endå større enn det som blei kjent i dag.
– Oljeselskapa er tradisjonelt konservative når dei rekner storleiken på oljefelt. Mest alltid er det slik at endeleg produksjon blir større enn spådommane, seier Bøe.
Det som nå kjem til å skje vidare er at selskapa kjem til å bore fleire avgrensningsborehol, for å finna utstrekninga av feltet. – I den prosessen kan det dukka opp nye lommar med olje, seier Harald Bøe.