To sauer tekne av bjørn

I førre veke fann sauebonde Kjetil Nessæther i Bøgrend i Vinje to av sauene ihelrivne av bjørn.

- Eg fekk melding av nokre hytteturistar som hadde funne eit kadaver, seier Nessæther.

Sauen hadde fått avrive juret og litt av bringa.

Fann ein sau til

Nokre dagar seinare fekk Nessæther melding om at det var funne nok ein ihelriven sau. 

- Og når det er funnen to ihelrivne sauer tek ein til å lure på om det ikkje er fleire, seier han.

No håpar han bjørnen har vandra vidare. Men skulle bjørnen framleis vere i området er det fleire sauebønder som kan få merke det.

Alt tyder på bjørn

Rovviltkontakt Olav Vesaas har sett nærare på sauekadavra og slo fast med ein gong at det var bjørn som hadde vore på ferde.

- Vi har ikkje funne spor, men alt tyder på at det er bjørn som har teke sauene, seier Vesaas.

Han trur ikkje bjørnen er farleg for menneske. Vesaas seier det må bli funne fleire kadaver før Fylkesmannen kan gje fellingsløyve på bjørnen.

- Viss folk skulle kome over bjørnen bør dei halde seg heilt roleg og trekke seg unna, seier Vesaas.