Torsdag kveld vart ei jente påkøyrd i gangfeltet ved krysset der det er avkøyrsel frå rv 5 til STX og fleire forretningar . Tysdag 25. september vart ein syklist påkøyrd av ein bil på same staden.
- LES OGSÅ:
- LES OGSÅ:
Noko må gjerast
Politiførstebetjent Kjell Magne Barsnes ved Florø politistasjon seier at dette langt frå er dei første trafikkuhella på denne staden.
– Etter det eg har oversyn over skjer det eitt eller to uhell der kvart år.
Han meiner noko må gjerast for å unngå fleire ulukker. Han meiner det rett og slett er for mykje å passe på for trafikantane på denne staden, der det er 50-sone, og det er busslommer på begge sidene av riksveg 5.
– Særleg når du som bilist kjem frå aust kan det vere mykje å halde styr på. Det står gjerne bilar som ventar på å køyre av mot STX, og desse stenger litt for sikten mot gangfeltet. 50 kilometer i timen er absolutt maksfart dersom du skal ha sjanse til å stanse.
– Bruk refleksvest
I tillegg er det ein hekk som stengjer for litt sikt, og Barsnes meiner første tiltaket bør vere å fjerne delar av den.
Uhellet torsdag kveld skjedde i skyminga, og Kjell Magne Barsnes ber alle som går og syklar om å kle seg slik at dei er lette å få auge på, gjerne med refleksvest.
Og bilistane ber han om å sette farten litt ned på denne staden, slik at dei har marginane på si side om dei må bråbremse for å unngå uhell.
NRK.no har vore i kontakt med Statens vegvesen, som no vil sjå nærare på trafikktilhøva i det aktuelle krysset.