At partiet også går for Liv Signe Navarsete på topp, kjem ikkje som noko stor overrasking.
Men at Sp-nestor Steinar Ness ikkje er å finne på den ti namn lange lista, er derimot meir overraskande.
– Han er ein kjempeflink og stor ressurs, men vi fann det ikkje rett å ha to namn frå Gaular blant våre ti namn. Då prioriterte vi Jenny Følling, seier leiar i Gloppen Senterparti, Bjarne Bø.
Vil stå høgt oppe
Innspelet frå lokallaget i Gloppen spelar dermed inn kommunalministeren, og partileiaren, på topp, med fylkessekretær Per Rune Vereide på andreplass.
Tredjeplassen går til fylkesvaraordførar Jenny Følling. Bø seier dei heile tida har hatt Vereide som sin lokale kandidat og difor ynskte han så høgt som mogleg på lista. Då sjølvsagt bak Navarsete.
– Dette er eit resultat av at vi har spelt ut og meiner at Gloppen Senterparti har ein god kandidat som er viljug til å stå høgt oppe, seier Bø.
– Ein god kandidat
Måndag gjekk Luster senterparti inn for å gje den tidlegare generalsekretæren Ness på plassen bak Navarsete. Dette er ein plass Erling Sande hadde sit, men som no står ledig etter at Sande har takka nei til renominasjon.
Senterpartilaga har frist til 1. oktober med å komme med sine prioriterte framlegg til nominasjonsmøtet som er 2. november. Bø seier dei vurderte Følling på andreplass.
– Men vi fann at som lokallag, så kan vi halde oppe vår kandidat. Han er ein god kandidat meiner vi, seier Bø.
Følling vs. Ness
Bø legg til at det var eit lett val mellom dei to Gaular-kandidatane i Følling og Ness.
– Vi meiner Følling har vore i ein sterk posisjon, aktiv i lokal og fylkespolitikken og var nær å bli fylkesordførar. Ho har ein god standing i fylket og når ho har signalisert at ho vil stå på lista så meinte vi at vi, av to gode kandidatar, måtte velje ein og fann det rett å prioritere Følling, seier Bø.