Eid-kaptein Aabrekks store helg

Hopp til innhold

Med andre ord ei god helg for nordfjordingen.

ALLE RESULTATA FRÅ SERIEOPNINGA I 3. DIVISJON FINN DU NEDST I SAKA.

– Det var litt artig dette her. Kjøpte leilegheit i går, det var stort. Kom til Florø med fly og var kaptein og midtstoppar for Eid, og scora to mål. Begge på corner og det er jo litt spesielt for ein liten mann som meg. Ja, det har vore ei spesiell helg, humrar 25-åringen på veg i leigebil frå Florø til Bergen.

God sesongstart

Aabrekk er tilbake i Eid-trøya etter tre år vekke. I mellomtida har han budd i Bergen og Oslo, der han også har spelt fotball for andre klubbar. No er han attende i vestlandshovudstaden, og har i samråd med trenarane i Eid sagt ja til å spele så mange kampar som mogleg.

Det starta laurdag med 2–1 siger borte mot Florø. Litt betre enn venta, og til dei grader mot spelets gang.

– Med den innsatsen som vart lagt ned i dag, så var det kjekt å vere kaptein. Dette var ein lagsiger, men eg tykte Ove Balsnes var veldig god for oss. I tillleg var det kjekt at debutant Oliver Rotihaug gjorde ein god kamp, seier i Bergen held seg kampklar på 4. divisjonslaget Djerv sine treningar.

30 cornerar

Det var einvegskøyring i kystbyen då 3. divisjonen starta laurdag. Eid scora på to av sine tre sjansar i kampen, medan heimelaget nærast eigde ballen – utan å kome til dei heilt store sjansane.

LES OGSÅ: Fraas sette standarden med brasse

– Vi kom dit og visste at vi ville møte eit godt lag, men vi skulle legge ned enormt bra innsats, tette att bak og ta sjansane våre framover. Den taktikken til trenar Frode Nord var svært god, seier Aabrekk og meiner Florø hadde rundt 30 cornerar i løpet av kampen – altså ein corner for kvart tredje speleminutt i snitt.

– Vart stressa

Eid sjokkerte heimelaget med to mål allereie før kvarteret var spelt. Begge mål på corner – og begge signert kaptein Aabrekk.

– Vi hadde ballen heile tida, men fekk mål i mot kvar gong Eid var innom 16-meteren vår. Eg trur vi vart stressa av heile situasjonen, seier FSK-trenar Terje Rognsø og skildrar 1–2 tapet som eit ran.

– Du har enkelte dagar der ballen ikkje vil i mål. Dagar då du ikkje har marginane på di side. Når det er sagt, så skapte vi heller ikkje nok sjansar totalt sett. Men vi er så pass mange gonger innom 16-meteren deira at det burde vi utnytta betre, held han fram.

– All ære til Eid

FSK er av mange tippa heilt i toppen av tabellen. Målet til FSK kom heilt på tampen, også det på ein corner, ved Simen Hamre.

– Før vi scora hadde eg kjensla av at vi kunne spelt til søndag, utan å score. Hadde vi fått første målet i dag, så kunne det blitt mykje. Men vi må fikse slike kampar også, seier Rognsø og trøystar seg med at det framleis er 25 kampar att av serien.

Topp-ti

Det er det også for Eid, som truleg blir mellom klubbane som kan få det tøft i årets 3. divisjon.

– Alle klubbane i Nordfjord har eit felles problem med lita spelargruppe og lite folk å ta av. Målet er likevel at vi klarer ei topp ti-plassering. Då må vi plukke masse poeng heime, avsluttar Aabrekk.