På Statens vegvesen sitt webkamera på E16 over Filefjell kunne ein i føremiddag sjå ein semitrailer stå litt på halv åtte ut i grøfta. Det synet er skremmande likt biletet frå same webkamera, på same dato i fjor.
Og det meir eller mindre på meteren.
Ein av skilnadene er at det denne januardagen var snakk om ein semitrailer, og i fjor var det eit vogntog. For Falck på Fagernes betydde den tyske trekkvogna med svensk tralle, nok eit oppdrag.
– Dette er eit standard jobb for oss, seier dagleg leiar Ståle Hagadokken som ved 12.45-tida akkurat hadde fått bilen på vegen att.
(Artikkelen held fram under biletet)
– Dette er typisk
Dei som driv med bilberging får stadig erfare at den smale vegen over Filefjell byr på problem. Når store køyrety møtast er det fort gjort å hamne utfor kanten.
– Han har nok kome litt for langt ut på kanten, og så har trekkvogna rett og slett sklidd ut, seier Hagadokken til NRK.no.
Han seier jobben med å berge bilen på vegen att var fort gjort, og slapp dermed langt billegare unna enn det bilbergarane gjorde den 5. januar i 2011.
Den gong hadde vogntoget lagt seg nesten heilt på sida i grøfta, og det måtte to bilbergingsbilar til for få køyretyet på rett kjøl att.
- LES OGSÅ:
(Artikkelen held fram under biletet)
– Var dårleg skodd
Bilar som står i grøfta blir det mange av i løpet av ein vinter. Hagadokken fortel at semitraileren som i dag enda i grøfta var heller dårleg skodd.
– No har eg akkurat selt han nokre kjettingar så han kjem seg trygt vidare.
– Han hadde nok det som kan kallast sommardekk, det er mønster, men ikkje godt nok til dette føret, sa Hagadokken til NRK like før klokka 13.