- Eg kan stadfeste at vi gjennomførte taktiske og tekniske undersøkingar i samband med eit dødsfall i Sogndal, seier lensmann Jan Tore Thue til NRK Sogn og Fjordane.
- Kvifor er det mistenkjeleg?
- Når me finn ein person liggjande død åleine, er det våre rutinar å etterforska dette, seier han.
Reagerer på unaturleg dødsårsak
Politiet rykte ut onsdag morgon, etter å ha fått eit tips om dødsfallet. Etter det NRK Sogn og Fjordane forstår skal dødsårsaka vera unaturleg.
- Han vart sist sett i live tysdag kveld, fortel politibetjent Rita Skjeldestad til NRK Sogn og Fjordane.
Har vore i kontakt med Kripos
Den døde mannen i slutten av 20-åra vart funnen i bustaden sin i Sogndal sentrum, og er ifølgje Sogn Avis send til Gades Institutt for obduksjon.
- Me ventar å få svar på obduksjonen i løpet av kort tid, fortel Skjeldestad.
Politiet i Sogndal har vore i kontakt med Kripos, men har teke seg av åstadsgranskinga sjølv.