Laurdag ettermiddag berga Kjell Rognaldsen truleg livet til ein mann som kantra med båt ved Kvamsøy i Balestrand.
Rongaldsen seier han blei ringt opp av ein hyttenabo som hadde sett mannen hamne i sjøen. Han seier at det berre var tilfeldigheiter som gjorde at dei fekk tak i båt tidsnok til å berge mannen.
– Naboen ringe og sa at det låg ein mann i sjøen. Eg ringde 113 og dei sette meg over til politiet. Der hadde dei lite lokalkunnskap, dei visste kvar Kvamsøy er, men ikkje korleis dei skulle få tak i båt.
- LES OGSÅ:
Traff hyttenabo med båt
Rognaldsen som har hytte i området, gav politiet tips om ein han kjende til som hadde båt før han sjølv sprang ned til sjøen. Der traff han heilt tilfeldig ein som hadde båt.
– Han hadde ein båt med 25 hestekrefter som vi fekk tak i. Vi reiste ut og fekk mannen opp i båten. Då var han temmeleg nedkjølt.
Politiet visste ikkje om nokon med båt
Rognaldsen seier han er overraska over at politiet ikkje hadde kontaktpersonar med båt i området.
– Det er sommar og folk er på mykje på sjøen. Politiet bør nesten vite at viss det skjer noko ein plass, så veit dei kvar dei kan få tak i båt. Eg vart ikkje imponert iallefall.
Meiner det er eit offentleg ansvar
I Redningselskapet meiner Geir Antonsen som er kaptein på redningsskøyta «Halvdan Grieg» at slik beredskap må vere eit offentleg ansvar.
– Det blir veldig usikkert å ferdast på havet viss du skal belage seg på at naboen skal komme å berge deg. Då er vi tilbake til 1800-talet då Redningsselskapet vart stifta. Eg tykkjer dette blir eit steg tilbake og ikkje eit steg fram.
– Hadde ikkje klart seg
Kjell Rognaldsen trur ikkje at mannen han berga hadde klart seg om han hadde blitt liggande mykje lenger i sjøen.
– Eg trur han hadde frose i hel. Han hadde flytedrakt på seg, men ingen varmedrakt.
– Gjorde det vi skulle
Politimeister Johan Brekke meiner politiet gjorde det dei skulle i samband med redningsaksjonen i Balsetrand i helga. Brekke seier det er vanleg prosedyre i slike situasjonar å spørre innringar om dei sjølve har tilgang på båt.
– Det er naturleg å gjere dette i slike saker: I tillegg har politiet ein ressursbase med telefonnummer til båteigarar som kan kontaktast. I dette tilfellet var ekspressbåten Fjordprins i nærleiken. Den vart dirigert mot staden, men i mellomtida vart mannen plukka opp andre. I tillegg vart ambulanse og luftambulanse sende til staden.