Fekk hai i garnet

Tirsdag morgon fekk Torstein Grønning og mannskapet på fiskebåten "Lamøysund" frå Sleneset ein hai i garnet. Haien vart fanga to mil vest av Træna fyr i Nordland.

Det skriv Rana Blad.

Dei fekk ein håbrann på 2,7 meter og nesten 200 kilo.

- Dei er vanlegvis rundt 50 kilo tunge, så dette var artig. Eg berre tenkte at eg måtte gjere mitt ytterste for å få haien på land.

Det er fleire grunnar til at fiskaren ville få haien om bord.

- Eg måtte jo finne ut kor tung den var. Dessutan er ein så stor fisk verdt nokre kroner, seier Grønning til NRK Nordland.

Fekk håbrann som liten gut

Men det er ikkje fyrste gong fiskaren Torstein Grønning har fått ein stor håbrann i garnet.

- Eg var med far min ut i båt ein gong når eg var liten gut, og då fekk me ein håbrann på 120 kilo. Eg hugsar at me ikkje fekk til å løfte haien opp i båten, men måtte slepe fisken inn til land.

- Den gongen nytta me sei-garn, tirsdag var det breiflabb-garn, fortel Grønning til NRK Nordland.

Haien vart i følgje Rana Blad levert inn til fiskemottaket Modolv Sjøset Fisk på Træna.

Og no endar fisken mest sannsynleg på tallerkenar i Italia, Spania og Frankrike.

På raudlista

Ifølgje WWF har me 7 kjente hai-artar i norske farvatn; pigghå, håkjerring, håbrann, brugde, blåhai, svarthå og revehai. Alle artane er lista anten som nært trua eller sårbar på den internasjonale raudlista, med unntak av svarthå.

Dei norske haiane pigghå og håbrann er merka som kritisk trua og risikerer å verte utrydda i nær framtid.