- Det er reaksjonar frå folk som gjer at vi no går inn for framleis å gje pengar til bokbåten, seier fylkesordførar Torill Selsvold Nyborg (KrF).
KrF gjekk opprinneleg inn for å leggje ned bokbåten, men reaksjonar frå mange ulike hald, blant anna forfattar Gunnar Staalesen, gjer at partiet no har snudd.
Reaksjonar
Leiar for fylkeskulturutvalet i Møre og Romsdal, Rigmor Andersen Eide (KrF), er ein av dei som reagerte.
I dag sa ho til NRK Hordaland at det ville vere svært uheldig om båtruta vart nedlagt.
Hordaland Frp sa før sitt gruppemøte i dag at dei ønskte å behalde båten, og no har dei altså fått gjennomslag for ønsket.
Glede ombord
Dagleg leiar Svein Ivar Vinnes i Skyssbåtservice som eig bokbåten, er strålande nøgd.
- Dette var utruleg, fantastisk flott, altså! Mot slutten av førre veke såg eg mørkt på det, men no blir det ei flott jul i år også, seier han.
Budsjettet skal behandlast i fylkestinget tysdag.