Små summar til store bygg

Finansminister Sigbjørn Johnsen (Ap) la tysdag fram Revidert nasjonalbudsjett.

Regjeringa lovar som venta oppstart til Kunst- og designhøgskolen i Bergen, pengar til rehabilitering av Universitetet i Bergen og prosjektpengar til ein genbank for laks og sjøaure i Hardanger.

Kunst- og designhøgskolen i Bergen

Regjeringa løyver 15 millionar kroner til startløyving til nybygg for Kunst- og designhøgskolen i Bergen. I dag er skulen lokalisert på seks ulike lokalitetar i Bergen. Nybygget skal reisast på Møllendal.

Kostnadsramma for prosjektet er 1,037 milliardar kroner. Prosjektet skal stå ferdig første halvår 2017.

Startløyvinga utgjer vel ein prosent av den totale prislappen.

Henning Warloe som sitt i Kirke-, utdannings- og forskningskomiteen på Stortinget for Høgre kritiserer Regjeringa for å overlate rekninga til regjeringa som skal styra etter valet.

Rehabilitering av Universitetsmuseet i Bergen

Regjeringa løyver i denne omgang 20 millionar som oppstartsløyving til rehabilitering av Universitetsmuseet i Bergen. Prosjektet omfattar sørfløyen i museet og den nye universitetsaulaen.

Prosjektet har ein samla prislapp på 328 millionar kroner. Løyvinga utgjer seks prosent av dei samla kostnadene knytt til prosjektet.

Prosjektet skal fullførast i andre halvår 2015.

Genbank i Hardanger

Regjeringa løyver 3 millionar til prosjektering av ein ny genbank i Hardanger. Genbanken skal sikra at bestandar av villaks og sjøaure vert tatt vare på.

Regjeringa føreslår at Miljøverndepartementet kjem med ei tilleggsløyving på 40 millionar kroner.

Håkonshallen i Bergen

Regjeringa vil løyva 6 millionar kroner for å rusta opp kjøkenet i stallbygget ved Håkonshallen i Bergen.

Prosjektet vil totalt kosta 12,5 millionar kroner. I tillegg vert det løyva 2,5 millionar til tiltak for universell utforming av tilkomsten til Håkonshallen.

CO₂-reinseanlegget på Mongstad

Regjeringa reduserer løyvinga til kjøp av forskingstenester frå teknologisenteret for CO₂-fangst på Mongstad. Reduksjonen er på 72 millionar kroner.

Grunnen er at Regjeringa ventar at staten sin del av kostnadene vert lågare enn ein hadde rekna med.

Verdihetssenteret i Bergen

Regjeringa aukar løyvingane til Verdighetssenteret i Bergen med 4 millionar kroner. Pengane skal brukast til opplæring av frivilligheitskoordinatorar.

Grotten

Det vert i Revidert nasjonalbudsjett løyva 5 millionar kroner til rehabilitering av Statens æresbustad Grotten i Oslo.

Jobben med å rehabilitera huset, der Jon Fosse bur i dag, vil kosta 12 millionar kroner.

Den siste store rehabiliteringa vart gjort i 1982.