Lom vart tidlegare i år utpeikt som nasjonalparklandsby, og ynskjer å bruke dette stempelet til å bli kvitt dei miljøskadelege plastposane.
Følgjer miljøvernministeren
Miljøvernminister Erik Solheim har gått ut og ynskt plastposen dit pepparen gror, og Lom er den fyrste kommuna som no tek initiativ til å setje dette ut i praksis.
- Vi skal ikkje forby nokon å bruke plastposar, men vi vil motivere og leggje til rette for eit meir miljøvenleg innkjøpsmønster.
Det seier prosjektleiar for småsamfunnssatsinga i Lom, Torill Bye Wilhelmsen.
Vil gje ut handlenett
Kommuna vil no ta kontakt med handelsstanden i Lom for å få til eit samarbeid. Eit alternativ er å bruke til dømes papirposar eller handlenett.
Wilhelmsen seier at dei au vil gje kvar husstand eit handlenett for å stimulere folk til å kutte ut bruken av plastpose.
- Vi har ikkje lyst til å kome med nokon peikefinger, men vi har tru på å gjere dette på ein måte som også innbyggjarane er med på, seier Torill Bye Wilhelmsen.
