Torsdag skal forsvarssjef Harald Sunde leggje fram sitt forslag til regjeringas langtidsprogram for Forsvaret dei neste fire åra.
Men lekkasjane har allereie nådd media, og forslag om å kutte kraftig i Heimevernet skapar auka stridslyst blant heimevernsoldatane.
– Eg trur det er ein forferdeleg dårleg strategi. Det verkar som dei er heilt historielause. Det går kjapt å bygge ned ting for å spare pengar, men det tek lang tid å byggje det opp att, seier heimevernsoldat Ola Matti Mittigård.
Flaum, ras og 22. juli
Mange meiner at forslaget om å redusere Heimevernet står i skarp kontrast til utviklinga i samfunnet.
Stadig meir ekstremt vêr med flaumar og ras stiller store krav til beredskap. Samtidig har terrorangrepet 22. juli vore ein oppvekkjar.
– Eg kan ikkje sjå at behovet for Heimevernet blir mindre. Samfunnet blir ikkje mindre sårbart og komplekst. Oppgåva vi har med å beskytte menneske og viktige samfunnsfunksjonar kjem til å ha like stor betydning i framtida.
Det seier stabssjef i HV-05 i Hedmark og Oppland, Ståle Grytli. Han får støtte frå beredskapssjef hjå Fylkesmannen i Oppland, Asbjørn Lund.
– Det som er viktig for beredskapen er at den ressursen som Forsvaret representerer blir oppretthalde.