Det er i samband med arbeidet med ei kommuneplanmelding at science fiction-forfattaren har kome med sitt innspel. Han sit også i kommunestyret for Gran Bygdeliste, og startar med å slå fast at språkbruken i planen er i overkant voldsom.
– Ingen set seg friviljug ned for å lese ein overordna plan på 65 sider, som dessutan er prega av eit tungt språk. Den skremmer folk frå å engasjere seg, seier Myhre til avisa Hadeland.
Fine ord og flosklar
Han meiner dei kommunale sakspapira er prega av fine ord og flosklar. Nå krev han at lange og fine ord blir erstatta med forståelege formuleringar.
– I eit demokrati må folk kunne setje seg inn i sakene. Dei skal kunne kritisere og avsløre. Da må dei forstå kva som blir sagt og kva som blir skreve, seier Myhre.
Rådmann Arne Skogsbakken i Gran takkar for innspelet frå Myhre, og er ikkje framand for å sende sine medarbeidarar på språkkurs.
– Mange offentlege etatar har teke tak i dette. Det bør kanskje vi også vurdere, seier Skogsbakken til avisa Hadeland.
