Det er fortsatt usemje om kvar den nye kyrkja i Våler skal byggjast. Den gamle brann ned i mai i fjor, og spørsmålet er om eit nytt gudshus skal byggjast på den gamle tomta eller på ein annan stad.
Arkitektforbundet vart bede om å kome med si meining i saka, men heller ikkje denne har bidrege til avklaring i saka.
For medan leiaren for planutvalet, Harry Vinje, meiner at konklusjonen er at det vil vere svært vanskeleg å byggje på den gamle tomta, ser Konterud på det på ein annan måte.
– Meldinga frå arkitektane viser at det er fullt mogleg å byggje på den gamle tomta, meiner han.
– Ligg fint til
Og det passar godt med Kjell Konterud sitt syn på kvar ei ny kyrkje bør liggje.
– Den gamle kyrkja låg fint på ei høgde ved inngangen til Våler. Og i forhold til universell utforming så er det den beste staden, seier ordføraren.
Og han vil ikkje love pengar til å byggje ei større og flottare kyrkje ein annan stad i kommunen.
– Sålangt har det ikkje kome nokon førespurnad om midler i tilfelle ein skulle gå utover forsikringssummen. Å byggje ei ny kyrkje 700 kvadratmeter større vil antakeleg ha ein kostnad frå 15 millionar kroner og oppover. Og dei pengane er ikkje disponible utan vidare frå kommunen si side.