Rekordmange i kø for å hjelpe barn på flukt

– Vi ser grufulle bilete kvar einaste dag. Den som ikkje vert påverka av det, forstår ikkje eg. Og vi har moglegheit til å hjelpe, seier Karl Fredrik Lind.

• Les også: Får én ny frivillig hvert 5. minutt

Ekstra informasjonsmøter

Dei har med seg vesle Johan på eitt år som kryp rundt på golvet, nysgjerrig på alt og alle.

– Vi har tid og moglegheit og lyst til å gjere noko frivillig. Og så er det litt fordi vi har fått ein son, og då skjer det noko med deg. Då får ein lyst til å hjelpe dei som ikkje har det så bra som han, seier Lind.

Saman med over 60 personar var familien på informasjonsmøtet til Redd Barna i Oslo.

Pågangen av frivillige har vore så stor at møtet tysdag vart sett opp ekstra.

– Vi opplever eit rush av folk vil hjelpe og bidra, og for å klare å ta imot alle må vi halde fleire informasjonsmøte. Det er heilt fantastisk! seier Annicken Lundgård i Redd Barna.

• Les også: Nordmenn har gitt 30 millioner til flyktningene
• Les også: Dette treng flyktningane no

Skal til transittmottak for leik og moro

Dei sterke bileta og historiene frå flyktningane dei siste vekene har fått folk til å strøyme til hjelpeorganisasjonane for å bidra.

Det har vore ei historisk pågang frå folk som vil arbeide som frivillig gjennom Redd Barna.

– Vi fortel om kva arbeid som frivillig inneber og kva aktivitetar ein kan vere med på som frivillige for asylantar på Refstad transittmottak og Torshov transittmottak i Oslo. Det norske folket har endeleg vakna og ser kva som skjer i Europa. Det er eit auka engasjement, og folk kjenner dei vil hjelpe.

• Les også: Nådde målet om Sverige etter seks timar på motorvegen

Klare for alt

Det er i hovudstaden presset er størst akkurat no, og dei frivillige fekk informasjon om kva dei kan vente seg, og gle seg til.

Også Røde Kors hadde køar tysdag. Der var over 200 møtt opp for å få informasjon om korleis dei kan hjelpe .

– Eg har alltid tenkt at eg skulle melde meg som frivillig, og no har eg moglegheit. Det er alltid mange som treng litt merksemd, seier Camilla Åsgård frå Askim.

Ho vil bidra med det som trengst. Med bakgrunn frå barnehage er ho klar til å leike med barna på mottaket.

– Eg er god på å perle, ler ho og seier det blir spennande.

Studentane Regine Karlsen frå Harstad og Pedro Alejandro Soto Ramos frå Chile vert svært påverka av bileta kjem frå Europa.

– Vil vil bidra, og synest det er forferdeleg å sjå familiane som prøver å overleve og som ikkje har noko. Vi lurer veldig på korleis dette blir, og vil gjerne komme i gang, smiler dei.