Ein mann i 60-åra vart måndag varetektsfengsla i fire veker etter at Spar-butikken vart forsøkt rana fredag.
I dag skriv Firda at mannen vart slått fleire gonger med si eiga hagle. Til slutt slo butikkeigar Olav Birkeland så hardt at våpenet gjekk i fleire bitar.
- LES OGSÅ: Truga butikktilsett med ladd hagle
– Politiet har gjort avhøyr på staden der det kjem fram at ein kan ha vore noko hardhendt med ranaren. Politiet vil måtte vurdere om den hardhendte handsaminga er i samsvar med kor alvorleg saka er, stadfestar aktor Anette Stegegjerdet Norberg overfor avisa.
Ville ha att hagla
Valdsbruken skal ha funne stad utanfor butikken i etterkant av ransforsøket. Mannen vart overmanna av butikkeigaren og fråteken hagla. Mannen skal ha prøvd å få att hagla, men vart under diskusjonen slått fleire gonger.
FORSØK: Ein 66-åring er varetektsfengsla i fire veker etter at han prøvde å rane Spar-butikken i Bygstad.
Foto: Johan Moen / NRKTil slutt gjekk hagla i fleire bitar.
- LES OGSÅ: – Sett i ettertid, var det rein galskap
– Vi slo ikkje for å ha det kjekt, men for å halde han ifrå oss. Vi var to som slo, og dette er det ingen av oss som slit med, for å seie det sånn, stadfestar butikkeigar Birkeland overfor Firda.
Brutal vald
Mannen var tydeleg prega av valden då han møtte til fengslingsmøtet i Fjordane tingrett. Han stod fram også som ein angrande syndar.
Forsvararen til mannen, Stig Nybø, meiner det som skjedde utanfor butikken står fram som brutalt.
- LES OGSÅ: – Støytande om han blir sleppt fri
– Alle skjønar at dei involverte her var i ein ekstrem situasjon, og det er ikkje sikkert at eg eller du hadde reagert noko annleis. Men eg må seie det står fram som brutalt, seier Nybø til avisa.