– Eg blei ganske sjokkert då eg såg i godtposen til ungen, seier Aileen Bjerkan.
Sundag kveld følgde Bjerkan sin ni år gamle steson med på «knask eller knep» i Tønsvika i Tromsø kommune.
Ved eit av husa dei stoppa ved, stakk ein mann handa heilt ned i godteposen før han slapp det han hadde i handa.
Bjerkan syntest det var litt merkeleg.
– Eg tenkte «OK, dette må me nok sjekka», seier ho.
Då dei kom heim fann ho fyrst tre patroner i godtposen, før ho ringde politiet.
Etterpå talde ho meir nøye over, og fann totalt 23 skarpe patroner i .22 kaliber.
Nordlys skreiv om saka fyrst.
Til avisa opplyser politiet at mannen no sit i arresten.
Hektisk kveld for politiet i Bergen
Politiet i Bergen anslår at dei har fått 15–20 meldingar om Halloween-feiringar som har gått over styr.
– Det har vore ein ganske travel kveld, seier operasjonsleiar i Vest politidistrikt, Knut Dahl-Michelsen.
Kring 18.00 ringde ein gutegjeng i 13-14-årsalderen i Fana politiet etter å ha blitt utsett for vald, skriv BA. Gutane skal ha fått lov til å ta to stykk godteri, men ein av dei tok tre. Mannen i huset skal ha rive ein gut i håret og lagt han eller ein annan gut i bakken.
– Den konflikten ser ut til å vera løyst no. Den vaksne parten har erkjent at det har gått litt for langt. Det er ikkje nokon som ynskjer å forfølgja no, seier Dahl-Michelsen.
– For mykje knep og for lite knask
Like før klokka åtte fekk politiet melding om at ein sykkel var blitt kasta frå ei bru i Fyllingsdalen. Ein person vart nesten treft av sykkelen.
I Fyllingsdalen skal det og ha blitt gjort skadeverk mot kjøpesenteret Oasen, samt oppskyting av fyrverkeri.
21.29 fekk politiet melding om at ein ungdom hadde blitt utsett for vald i området ved Rothaugen skole.
Ein halvtime seinare meldte politiet at dei var på jakt etter ungdommar på Skjold, då dei mistenkte at det var blitt skote fyrverkeri mot Bybanen.
– Det pleier alltid å bli litt på desse dagane. Litt tull og spøkar er greitt, men det er kanskje dratt litt for langt.
– Det har vore for mykje knep og for lite knask, det er korrekt samanfatta, seier Dahl-Michelsen.
Kasta egg på personar, bilar og hus
Politiet i Agder meldte søndag kveld at dei hadde fått inn fleire meldingar om ungdomar som kastar egg på personar, bilar og hus.
Politiet opplyser at dei ikkje hadde kapasitet til å rykka ut på nokon av oppdraga.
Politiet i Oslo har fått inn meldingar om det same.
– Me er på Bøler der ungdomar har kasta egg på bilar som køyrde forbi. Me har fått peikt ut nokon gutar som me har kontroll på, meldte dei på Twitter tidlegare i kveld.
Kort tid etter blei det også kasta egg etter ein politibil. Politiet fekk tak i vedkomande og «tar ein alvorsprat».
I Drammen har det kome inn fleire meldingar om brann i bosspann. Politiet har meldt at dei har kontroll på alle.