Det er svært sterk vind og nedbør som snø i fjellet fleire stader, og dette skaper søndag morgon vanskelege køyreforhold.
Forholda forverra seg utover kvelden laurdag og natt til søndag. Tidleg søndag morgon var det stengingar og kolonnekøyring på dei fleste stader. Berre på Filefjell var det ope for fri ferdsle.
Situasjonen har betra seg gradvis utover dagen, og klokka 14.30 er det ope for fri ferdsle også på riksveg 13 over Vikafjellet, på riksveg 15 over Strynefjellet og på fylkesveg 53 Årdal-Tyin.
Klokka 14.30 er stoda slik:
- E16 Filefjell – snø og isdekke. Det var klokka 06.30 liten kuling og snø, men fri ferdsle
- Riksveg 13 Vikafjellet – opna for fri ferdsle etter at det var kolonnekøyring tidlegare
- Riksveg 15 Strynefjellet - opna for normal trafikk. Her kan det bli innført kolonnekøyring igjen
- Riksveg 52 Hemsedalsfjellet – kolonnekøyring grunna uvêr
- Fylkesveg 13 Gaularfjellet – stengd grunna uvêr
- Fylkesveg 50 Hol-Aurland – stengd grunna vegarbeid ved Geiteryggtunnelen
- Fylkesveg 53 Årdal-Tyin – opna for trafikk etter at vegen var stengd grunna uvêr
SJÅ OPPDATERTE VEGMELDINGAR HER
I løpet av natta har entreprenørar også fjerna eit par tre som har lagt seg over vegane, men desse problema er det rydda opp i søndag morgon.
Også på ferjesambandet Manheller-Fodnes på riksveg 5 i Sogn har dei fått merke vinden. Mellom klokka 06 og 08 søndag morgon var vinden så sterk at dei måtte gå til kai i Lærdal i staden for ved Fodnes.