Mann i 30-åra omkom etter å ha blitt påkøyrd av Bybanen

Mannen køyrde elsparkesykkel og blei påkøyrd av ei bybanevogn då han kryssa bybanelinja, ifølge politiet.

Han blei liggande under fremre del av bana, melde politiet like før klokka halv åtte måndag morgon.

Då politiet melde om hendinga skreiv dei at mannen var komen laus, og blei behandla av lege og ambulansepersonell på staden, men at skadeomfanget var ukjend.

Cirka ein halvtime seinare, klokka 07.52, melde dei at vedkomande var død som følge av skadane han blei påført.

Dei pårørande er varsla og har fått tilbod om vidare oppfølging, ifølge politiet.

Ulykka skjedde ved Nonneseter bybanestopp i Bergen sentrum.

– El-sparkesyklisten har kryssa bybanelinja her medan den eine Bybanen var på tur inn mot stoppet her. Det blei ein kollisjon og vedkomande hamna under Bybanen og omkom på staden, seier politiets innsatsleiar Frank Listøl.

Heile bybanelinje 1 hadde driftsstans som følge av ulykka.

Status som mistenkt

Både føraren av den aktuelle bybana og avdøde har status som mistenkt, opplyser politiadvokat Kjersti Katrine Svendsen til NRK like før kl. 13 måndag.

Politiet har gjennomført nokre vitneavhøyr, men veit ikkje om dei treng fleire endå.

– Det blir viktig å sjå på kameraovervakinga, både frå den aktuelle bybana og den som kom i mot. Vi håpar at kamera ved Nonneseter bybanestopp også har fanga opp noko som kan gi oss eit betre bilde av hendinga, seier Svendsen.

Det er framleis uklart nøyaktig kor elsparkesyklisten kryssa sporet, ifølge politiet.

– Vi må sjå på om elsparkesyklisten har gjort noko feil i forhold til aktsomheitsregelen, og så må vi sjå på kva bybaneføraren har gjort, seier Svendsen.

Undersøkingar på staden

Politiet er enno ikkje kjende med kor lenge vedkomande blei liggande under Bybanen.

– Vedkomande kryssa ikkje eit gangfelt, men kryssa bybanetraseen ein annan plass, seier Listøl.

Dei hentar no inn vitneopplysningar, videoovervaking og gjer åstadundersøkingar på staden. Politiet seier det har vore mykje folk på staden, då ulykka skjedde i eit sentrumsnært område.

– Dette har skjedd i morgonrushet og det har skapt store trafikale utfordringar og, seier Listøl.

Bybaneføraren og andre vitne til hendinga får tilbod om vidare oppfølging av mellom anna helsepersonell.

Mykje videovervåking

Havarikommisjonen er varsla etter ulykka, men rykker ikkje ut til staden fordi ulykka er godt dokumentert på video, og fordi det var mange vitne til hendinga.

– Det er videovervåking i alle bybanene i Bergen, slik at ulykka truleg vil vere filma der. Det kan gi oss ei god forståing for kva som har skjedd, seier Listøl.

Først melde politiet at ulykkesgruppa til Statens vegvesen er varsla og på veg til staden, men etter konferanse med innsatsleiar rykker ikkje ulykkesgruppa likevel.

– Dette på bakgrunn av den informasjonen som politiet har innhenta rundt ulykka.

Klokka 08.25 melder politiet at ulykkesstaden er i ferd med å bli frigitt, og at trafikken vil bli forsøkt sett i gang igjen om kort tid.

Etter ulykka var det full driftsstans på linje 1. Like før klokka 08 melder Skyss at Bybanen er innstilt mellom stoppa Byparken og Danmarksplass.